To knowe the verrey degre of eny maner sterre,
straunge or unstraunge, after his longitude; though he be indetermynat in
thin Astralabye, sothly to the trouthe thus he shal be
knowe.
Tak the altitude of this sterre whan he is on the est syde of
the lyne meridionall, as nye as thou mayst gesse; and tak an
ascendent anon right by som manere sterre fix which that thou
knowist; and forget not the altitude of the firste sterre ne thyn
ascendent. And whan that this is don, aspye diligently whan this
same firste sterre passith eny thyng the south westward; and
cacche him anon right in the same nomhre of altitude on the west
syde of this lyne meridional, as he was kaught on the est syde;
and tak a newe ascendent anon-ryght by som maner sterre fix which
that thou knowist, and forget not this secunde ascendent. And
whan that this is don, rekne than how many degrees ben bitwixe
the firste ascendent and the secunde ascendent; and rekne wel the
myddel degre bitwene bothe ascendentes, and set thilke myddel
degre upon thyn est orizonte; and wayte than what degre that
sitte upon the lyne meridional, and tak there the verrey degre
of the ecliptik in which the sterre stondith for the tyme. For
in the ecliptik is the longitude of a celestiall body rekned
evene fro the heved of Aries unto the ende of Pisces; and his
latitude is rekned after the quantite of his declynacioun north
or south toward the polys of this world.
As thus: Yif it be of the sonne or of eny fix sterre, rekne
hys latitude or his declinacioun fro the equinoxiall cercle; and
if it be of a planete, rekne than the quantite of his latitude
fro the ecliptik lyne, all be it so that fro the equinoxiall may
the declinacioun or the latitude of eny body celestiall he rekned
after the site north or south and after the quantite of his
declinacioun. And right so may the latitude or the declinacioun
of eny body celestiall, saaf oonly of the sonne, after hys site
north or south and after the quantite of his declinacioun, be
rekned fro the ecliptik lyne; fro which lyne alle planetes som
tyme declinen north or south saaf oonly the forseide sonne.
